ਅਸਾਂ ਅੱਗ ਦੇ ਵਸਤਰ ਪਾਉਣੇ ਨੇ ,ਨਜ਼ਦੀਕ ਨਾ ਹੋ
ਅਸਾਂ ਧਰਤ ਆਕਾਸ਼ ਜਲਾਉਣੇ ਨੇ ਨਜ਼ਦੀਕ ਨਾ ਹੋ
ਮੈਨੂੰ ਸ਼ੀਸ਼ੇ ਨੇ ਠੁਕਰਾ ਕੇ ਪਥਰ ਕੀਤਾ ਹੈ
ਹੁਣ ਮੈਂ ਸ਼ੀਸ਼ੇ ਤਿੜਕਾਉਣੇ ਨੇ ਨਜ਼ਦੀਕ ਨਾ ਹੋ
ਜਾਹ ਤੈਥੋਂ ਮੇਰਾ ਸਾਥ ਨਿਭਾਇਆ ਜਾਣਾ ਨਹੀਂ
ਮੇਰੇ ਰਸਤੇ ਬੜੇ ਡਰਾਉਣੇ ਨੇ ਨਜ਼ਦੀਕ ਨਾ ਹੋ
ਅਸਾਂ ਸੱਜਣਾ ਦੀ ਗਲਵੱਕੜੀ ਦਾ ਨਿਘ ਮਾਣ ਲਿਆ
ਹੁਣ ਦੁਸ਼ਮਣ ਗਲੇ ਲਗਾਉਣੇ ਨੇ ਨਜ਼ਦੀਕ ਨਾ ਹੋ
ਅਸੀਂ ਜਿਨ੍ਹੀ ਰਾਹੀਂ ਤੁਰਨਾ ,ਓਥੇ ਸੱਜਣਾ ਨੇ
ਸੁਖ ਨਾਲ ਅੰਗੇਆਰ ਵਿਛਾਉਣੇ ਨੇ ਨਜ਼ਦੀਕ ਨਾ ਹੋ
ਅਸਾਂ ਕਤਰਾ ,ਦਰਿਆ ,ਸਾਗਰ ਹੋਣਾ ਸਹਿਰਾ ਤੋਂ
ਅਸਾਂ ਖੇਲ ਅਨੇਕ ਰਚਾਉਣੇ ਨੇ ਨਜ਼ਦੀਕ ਨਾ ਹੋ
...ਤਰਲੋਕ ਜੱਜ
